‘O MATRIMONIO D’O GUARRACINO
Rielaborazione di Roberto De Simone
Della famosa favola del “Guarracino” esistono tuttora moltissimi episodi nella tradizione viva della Campania. E’ questo il racconto di questo eroe marino attraverso il quale si può vedere quanto siano diversi il testo e la melodia autentica dalla ottocentesca versione riportata dalle stampe. (Tratto dal booklet del CD «Nascette mmiez’o mare» di Concetta Barra, registrato nel 1974)
Lo guarracino che jeva p’o mare
jeva truvanno ‘e se nzorà
e se facette nu bello vestito
‘e squame ‘e pesce pulito pulito
visitanno fosse e pertose
se ncuntraje c’a zia vavosa
là pe là le facette ‘a mmasciata
e ‘o matrimonio fuje cumbinato
P’o spusalizio ce fuje mmitato
‘o scuorfano ‘o ciefalo e ‘o pesce spada
alici e sarde a meliune
anguille murene e capitune
merluzze spinule e purpetielle
treglie mazzune e cecenielle
aurate dentece e calamare
e ‘o delfino facette ‘o cumpare
Nu pesce bannera tutto aparato
l’ha beneritto cu l’acqua salata
e ‘o guarracino dicette allero
“Finalmente me sì mugliera”
“Evviva ‘e spuse” abbajaje ‘o pescecane
e tutte ‘e pisce sbattettero ‘e mmane
tra vase e squase abbracciamente
accuminciaje ‘o festeggiamento
Ascette mmiez la guaguiglia
ca cumannava na bella quadriglia
aropp’ascettero li seccetelle
cu ‘e tammorre e ‘e castagnelle
e accussì nzieme a li spuse nu uallo
s’abballaje la tarantella
accumpagnato d’o pesce salmone
ca sunava lo calascione
La sardella se sente ind’a panza
comme si fosse na cuntrattanza
“Aiuto aiuto” alluccaje n’alice
“Priesto chiammate na levatrice”
“E’ cos’’e niente” dicette ‘a murena
“Chella ‘a sposa già eva prena”
“A chi è figlio” strillaje ‘o guarracino
“M’ha fatto curnuto ‘e Santu Martino”
“O ssaccio” alluccaje ‘o sparaglione
“stu mbruoglio l’ha fatto c’o capitone”
allucche strille nu parapiglia
tra pisce estranei e la famiglia
venettero mmiezz amice e pariente
e subbeto ascettero a pisce fetiente
a tutt chest li pisce mmitate
s’appicicavano ll’une cu ll’ate
Chianette ponie e secossune
pacchere cavece e scerevicchiune
e succerette proprio na uerra
nu fuja fuja e nu serra serra
cinquanta muorte duicento ferite
e n’ati vinte m’periculo ‘e vita
e ll’ate jettero add’o speziale
pe piglià ll’acqua turriacale
E la sposa pe la paura
se sgravaje na criatura
e fuje na granda maraviglia
pecchè facette lu scunciglio
e accussì se facette ‘o festino
d’o spusalizio d’o guarracino
e accussì se facette ‘o festino
d’o spusalizio d’o guarracino