'O VIENTO
Pe' mare, na dummeneca d'estate,
c' 'o cuttariello 'ncalma, sott' 'o sole...
LI' afa è accussì pesante
ca, si parie, te stancano 'e pparole.
Na cupola celeste e trasparente
me pare 'o cielo, ca cummoglia Napule
e se perde, luntano, senza fine.
Aunìte o sparpagliate
pe' Pròceta, Pusilleco, Surriento,
chesti vvele latine,
arze 'e calore e stanche,
nchiummate a mmare, senza n'ombra
pareno tanta palummelle janche
appezzàte ogneduna cu na spingula...
Che pace! Che silenzio
Stiso 'ncuperta, 'e spalle e 'o pietto 'a fore,
Penzo surtanto ca... nun penzo a niente...
Nu vuzzo 'e piscatore
vota nnanza « Donn' Anna »,
sotto a stu sole ardente...
(Sbatteno 'e terzarule lentamente
'rifaccia a sti vvele 'npanna...)
A ttemmone, 'o cchiù viecchio marenare,
c' 'a cicca mmocca, meglio d' 'o ffumà,
mo guarda a mmare,
mo dà n' uocchio e mo mbrusunèa c' 'o viento ;
pecchè, p' 'a gente 'e mare,
'o viento è comme a ‘na perzona viva
ne sanno 'a voce, 'e mmosse, 'o tradimento;
ne sanno 'e bbon' azione e 'a nfamità...
Ogge, è cchiù infamo e dispettuso ancora
Nun ce aggio avuto sciorta !
... Ma che cuntrora !
Che cuntrora schiattosa !
calma eterna 'ncopp' a st' acqua morta
nce nfonno 'a mano e quase nun s'è nfosa...
St' addore 'e fune 'e buordo e de lignamme,
vernice, « piccepaino »,
stu senzo 'e salimastro e de catramme,
ca quanno nun c' è viento, cchiù se sente,
me trase int' 'e ccervelle, acutamente...
Tengo n' arzura 'incanna...
(... Sbatteno 'e terzarule lentamente
'nfaccia a sti vvele 'npanna...)
Ma, a nu mumento a n' ato,
llà... fore Capre... ancora cchiù luntano,
‘na macchiulella blù,
ma accussì blù ca pare quase nera,
se stennie 'ncopp' all'acqua...
È n'ombra, è niente
te pienze tu ;
ma ll' ommo 'e mare, fisso,
cu ll' uocchio afflussiunato,
già, primm' 'e te, l' ha visto,
zitto eh' è isso è 'o viento...
... 'Oi lloco... 'Oi lloco...
Rèfola ca s'accosta chiano chiano,
se fa desiderà...
Pare cumm' a na femmena,
ca se ciancèa nu poco
primm' 'e se fa vasà...
Po 'a macchia blù se spanne ; e mo so' ttante
ca se ncrucèano mmiez"o golfo 'e Napule...
'O mare, fino a mmo, janco, abbagliante,
sott' a stu sole 'e fuoco,
cagna culore : mo è turchino - ardesia
nu velluto turchino - ardesia... 'Oi lloco...
Mpruvisamente,
comme schezzechiasse appena appena,
pare ca mille e mille àcene 'arena,
attuorno a nuie, chioveno a mmare e 'o pogneno,
'o stuzzicano, 'o smoveno....
'Aguanta 'a scotta... Forza...
L'arberatura schioppa... 'E vvele sbanneno,
ruciulèa sottaviento nu binocolo...
'O còttero va « orza »...
Nu poco ancora... N' atu ppoco ancora...
Pare eh' affonna, pare,
cu 'a murata 'int' all'acqua e a chiglia 'a fore...
... Che viento frisco!
... E quant' è bello, 'o mare
ca fragne a ppoppa e sciaqquettèa p' 'a prora...