loader
menu
© 2024 Eddyburg

12 Canzoni napoletane cantate da Roberto Murolo
11 Luglio 2004
Canzoni e arie
Canzoni tratte da Napoletana, Antologia cronologica della canzone partenopea , presentata da Roberto Murolo, Dischi Ricordi. In fondo alla pagina potete scaricare il file, e ascoltarlo sul vostro computer; ci vogliono soltanto un collegamento veloce e un po’ di pazienza (sono file dell’ordine dei 2 Mb).

Ho scelto queste canzoni: Fenesta vascia, La cammesella, Te voglio bene assaie, Fenesta ca lucive, Era de maggio, ‘E spingule frangese, Voce ‘e notte, Guapparia, Dicitincello vuie, Tammurriata nera, Vierno, Accarezzame. (A Lo Guarracino è dedicata un’intera cartella)

Fenesta vascia

di ignoti

Fenesta vascia 'e padrona crudele,

quanta suspire mm'haje fatto jettare!...

Mm'arde stu core, comm'a na cannela,

bella, quanno te sento annommenare!

Oje piglia la 'sperienza de la neve!

La neve è fredda e se fa maniare...

e tu comme si' tanta aspra e crudele?!

Muorto mme vide e nun mme vuó' ajutare!?...

Vorría addeventare no picciuotto,

co na langella a ghire vennenn'acqua,

Pe' mme ne jí da chisti palazzuotte:

Belli ffemmene meje, ah! Chi vó' acqua...

Se vota na nennella da llá 'ncoppa:

Chi è 'sto ninno ca va vennenn'acqua?

E io responno, co parole accorte:

Só' lacreme d'ammore e non è acqua!...

La Cammesella

di ignoti (1700)

E llevete lu mantesino

- Lu mantesino 'gnornò, 'gnornò!-

Si nun te lo vuo' lleva',

me soso e me ne vado da 'cca.

- E 'tte me l'aggio levato,

Ciccillo cuntento, fa' quello che vuo'-

Sia benedetta 'a mammeta,

quanno 'te maritò.

E llevete lu suttanino

- Lu suttanino 'gnornò, 'gnornò!-

Si nun te lo vuo' lleva',

me soso e me ne vado da 'cca.

- E 'tte me l'aggio levato,

Ciccillo cuntento, fa' quello che vuo'-

Sia benedetta 'a mammeta,

quanno 'te maritò.

E llevete chisto cursetto

- Chisto cursetto 'gnornò, 'gnornò!-

Si nun te lo vuo' lleva',

me soso e me ne vado da 'cca.

- E 'tte me l'aggio levato,

Ciccillo cuntento, fa' quello che vuo'-

Sia benedetta 'a mammeta,

quanno 'te maritò.

E llevete la cammesella.

- La cammesella 'gnornò, 'gnornò!-

Si nun te la vuo' lleva',

me soso e me ne vado da 'cca.

- E 'tte me l'aggio levata,

Ciccillo cuntento, fa' quello che vuo'-

Sia benedetta 'a mammeta,

quanno 'te maritò.

E dammece nu vasillo.

- Nu vasillo 'gnornò, 'gnornò!-

Si nun me lo vuo' da',

me soso e me ne vado da 'cca.

- Ed ecchete 'cca lu vasillo,

Ciccillo cuntento, fa' quello che vuo'-

Sia benedetta 'a mammeta,

quanno 'te maritò.

Te voglio bene assaie

versi di Raffaele Sacco, musica attribuita a Gaetano Donizetti (1835)

Pecché quanno mme vide,

te 'ngrife comm'o gatto?

Nenné', che t'aggio fatto,

ca nun mme puó' vedé?!

Io t'aggio amato tanto...

Si t'amo tu lo ssaje!

Io te voglio bene assaje...

e tu non pienze a me!

Io te voglio bene assaje...

e tu non pienze a me!

La notte tutti dormono,

ma io che vuó durmire?!

Penzanno a nénna mia,

mme sento ascevolí!

Li quarte d'ora sonano

a uno, a duje, a tre...

Io te voglio bene assaje...

e tu non pienze a me!

Io te voglio bene assaje...

e tu non pienze a me!

Recòrdate nu juorno

ca stive a me becino,

e te scorréano, 'nzino,

le llacreme, accussí!...

Deciste a me: "Non chiagnere,

ca tu lo mio sarraje..."

Io te voglio bene assaje...

e tu non pienze a me!

Io te voglio bene assaje...

e tu non pienze a me!

Fenesta ca lucive

versi di ignoto, musica attribuita a Vincenzo Bellini (s. d.)

Fenesta ca lucive e mo nun luce...

sign'è ca nénna mia stace malata...

S'affaccia la surella e mme lu dice:

Nennélla toja è morta e s'è atterrata...

Chiagneva sempe ca durmeva sola,

mo dorme co' li muorte accompagnata...

Va' dint''a cchiesa, e scuopre lu tavuto:

vide nennélla toja comm'è tornata...

Da chella vocca ca n'ascéano sciure,

mo n'esceno li vierme...Oh! che piatate!

Zi' parrocchiano mio, ábbece cura:

na lampa sempe tienece allummata...

Addio fenesta, rèstate 'nzerrata

ca nénna mia mo nun se pò affacciare...

Io cchiù nun passarraggio pe' 'sta strata:

vaco a lo camposanto a passíare!

'Nzino a lo juorno ca la morte 'ngrata,

mme face nénna mia ire a trovare!..

Era de maggio

versi di Salvatore Di Giacomo, musica di Mario Costa (1885)

Era de maggio e te cadéano 'nzino,

a schiocche a schiocche, li ccerase rosse...

Fresca era ll'aria...e tutto lu ciardino

addurava de rose a ciento passe...

Era de maggio, io no, nun mme ne scordo,

na canzone cantávamo a doje voce...

Cchiù tiempo passa e cchiù mme n'allicordo,

fresca era ll'aria e la canzona doce...

E diceva: "Core, core!

core mio, luntano vaje,

tu mme lasse, io conto ll'ore...

chisà quanno turnarraje!"

Rispunnev'io: "Turnarraggio

quanno tornano li rrose...

si stu sciore torna a maggio,

pure a maggio io stóngo ccá...

Si stu sciore torna a maggio,

pure a maggio io stóngo ccá."

E só' turnato e mo, comm'a na vota,

cantammo 'nzieme lu mutivo antico;

passa lu tiempo e lu munno s'avota,

ma 'ammore vero no, nun vota vico...

De te, bellezza mia, mme 'nnammuraje,

si t'allicuorde, 'nnanz'a la funtana:

Ll'acqua, llá dinto, nun se sécca maje,

e ferita d'ammore nun se sana...

Nun se sana: ca sanata,

si se fosse, gioja mia,

'mmiez'a st'aria 'mbarzamata,

a guardarte io nun starría !

E te dico: "Core, core!

core mio, turnato io só'...

Torna maggio e torna 'ammore:

fa' de me chello che vuó'!

Torna maggio e torna 'ammore:

fa' de me chello che vuó'!"

‘E spingule frangese

versi di Salvatore Di Giacomo, musica di Enrico De Leva (1888)

Nu juorno mme ne jètte da la casa,

jènno vennenno spíngule francese...

Nu juorno mme ne jètte da la casa,

jènno vennnenno spíngule francese...

Mme chiamma na figliola: "Trase, trase,

quanta spíngule daje pe' nu turnese?"

Mme chiamma na figliola: "Trase, trase,

quanta spíngule daje pe' nu turnese?

Quanta spíngule daje pe' nu turnese?"

Io, che sóngo nu poco veziuso,

sùbbeto mme 'mmuccaje dint'a 'sta casa...

"Ah, chi vò' belli spingule francese!

Ah, chi vò' belli spingule, ah, chi vò'?!

Ah, chi vò' belli spingule francese!

Ah, chi vò' belli spingule ah, chi vò'!?"

Dich'io: "Si tu mme daje tre o quatto vase,

te dóngo tutt''e spíngule francese...

Dich'io: "Si tu mme daje tre o quatto vase,

te dóngo tutt''e spíngule francese...

Pízzeche e vase nun fanno purtóse

e puo' ghiénchere 'e spíngule 'o paese...

Pízzeche e vase nun fanno purtóse

e puo' ghiénchere 'e spíngule 'o paese...

E puó' ghiénchere 'e spíngule 'o paese...

Sentite a me ca, pure 'nParaviso,

'e vase vanno a cinche nu turnese!...

"Ah, Chi vò' belli spíngule francese!

Ah, Chi vò' belli spíngule, ah, chi vò'?!

Ah, chi vò' belli spíngule francese!

Ah, chi vò' belli spíngule, ah, chi vò'?!"

Dicette: "Bellu mio, chist'è 'o paese,

ca, si te prore 'o naso, muore acciso!"

Dicette: "Bellu mio, chist'è 'o paese,

ca, si te prore 'o naso, muore acciso!"

E i' rispunnette: "Agge pacienza, scusa...

'a tengo 'a 'nnammurata e sta ô paese..."

E i' rispunnette: "Agge pacienza, scusa...

'a tengo 'a 'nnammurata e sta ô paese

'A tengo 'a 'nnammurata e sta ô paese...

E tene 'a faccia comm''e ffronne 'e rosa,

e tene 'a vocca comm'a na cerasa...

Ah, chi vò' belli spîngule francese!

Ah, chi vò' belli spíngule, ah, chi vò'?!

Ah, chi vò' belli spíngule francese!

Ah, chi vò' belli spíngule, ah, chi vò'?!"

Voce ‘e notte

versi di Edoardo Nicolardi, musica di Ernesto De Curtis (1905)

Si 'sta voce te scéta 'int''a nuttata,

mentre t'astrigne 'o sposo tujo vicino...

Statte scetata, si vuó' stá scetata,

ma fa' vedé ca duorme a suonno chino...

Nun ghí vicino ê llastre pe' fá 'a spia,

pecché nun puó' sbagliá 'sta voce è 'a mia...

E' 'a stessa voce 'e quanno tutt'e duje,

scurnuse, nce parlávamo cu 'o "vvuje".

Si 'sta voce te canta dint''o core

chello ca nun te cerco e nun te dico;

tutt''o turmiento 'e nu luntano ammore,

tutto ll'ammore 'e nu turmiento antico...

Si te vène na smania 'e vulé bene,

na smania 'e vase córrere p''e vvéne,

nu fuoco che t'abbrucia comm'a che,

vásate a chillo...che te 'mporta 'e me?

Si 'sta voce, che chiagne 'int''a nuttata,

te sceta 'o sposo, nun avé paura...

Vide ch'è senza nomme 'a serenata,

dille ca dorme e che se rassicura...

Dille accussí: "Chi canta 'int'a 'sta via

o sarrá pazzo o more 'e gelusia!

Starrá chiagnenno quacche 'nfamitá...

Canta isso sulo...Ma che canta a fá?!..."

Guapparia

versi di Libero Bovio, musica di Rodolfo Falvo (1914)

Scetáteve, guagliune 'e malavita...

ca è 'ntussecosa assaje 'sta serenata:

Io sóngo 'o 'nnammurato 'e Margarita

Ch'è 'a femmena cchiù bella d''a 'Nfrascata!

Ll'aggio purtato 'o capo cuncertino,

p''o sfizio 'e mme fá sèntere 'e cantá...

Mm'aggio bevuto nu bicchiere 'e vino

pecché, stanotte, 'a voglio 'ntussecá...

Scetáteve guagliune 'e malavita!...

E' accumparuta 'a luna a ll'intrasatto,

pe' lle dá 'o sfizio 'e mme vedé distrutto...

Pe' chello che 'sta fémmena mm'ha fatto,

vurría ch''a luna se vestesse 'e lutto!...

Quanno se ne venette â parta mia,

ero 'o cchiù guappo 'e vascio â Sanitá...

Mo, ch'aggio perzo tutt''a guapparía,

cacciatemmenne 'a dint''a suggitá!...

Scetáteve guagliune 'e malavita!...

Sunate, giuvinò', vuttàte 'e mmane,

nun v'abbelite, ca stó' buono 'e voce!

I' mme fido 'e cantá fino a dimane...

e metto 'ncroce a chi...mm'ha miso 'ncroce...

Pecché nun va cchiù a tiempo 'o mandulino?

Pecché 'a chitarra nun se fa sentí?

Ma comme? chiagne tutt''o cuncertino,

addó' ch'avess''a chiagnere sul'i'...

Chiágnono sti guagliune 'e malavita!...

Dicitencello vuie

versi di Enzo De Fusco, musica di Rodolfo Falvo (1930)

Dicitencello a 'sta cumpagna vosta

ch'aggio perduto 'o suonno e 'a fantasia...

ch''a penzo sempe,

ch'è tutt''a vita mia...

I' nce 'o vvulesse dicere,

ma nun ce 'o ssaccio dí...

'A voglio bene...

'A voglio bene assaje!

Dicitencello vuje

ca nun mm''a scordo maje.

E' na passione,

cchiù forte 'e na catena,

ca mme turmenta ll'anema...

e nun mme fa campá!...

Dicitencello ch'è na rosa 'e maggio,

ch'è assaje cchiù bella 'e na jurnata 'e sole...

Da 'a vocca soja,

cchiù fresca d''e vviole,

i' giá vulesse sèntere

ch'è 'nnammurata 'e me!

'A voglio bene...

..........................

Na lácrema lucente v'è caduta...

dicíteme nu poco: a che penzate?!

Cu st'uocchie doce,

vuje sola mme guardate...

Levámmoce 'sta maschera,

dicimmo 'a veritá...

Te voglio bene...

Te voglio bene assaje...

Si' tu chesta catena

ca nun se spezza maje!

Suonno gentile,

suspiro mio carnale...

Te cerco comm'a ll'aria:

Te voglio pe' campá!...

Tammurriata nera

versi di Edoardo Nicolardi, musica di E. A. Mario (1944)

Io nun capisco, ê vvote, che succede...

e chello ca se vede,

nun se crede! nun se crede!

E' nato nu criaturo niro, niro...

e 'a mamma 'o chiamma Giro,

sissignore, 'o chiamma Giro...

Séh! gira e vota, séh...

Séh! vota e gira, séh...

Ca tu 'o chiamme Ciccio o 'Ntuono,

ca tu 'o chiamme Peppe o Giro,

chillo, o fatto, è niro, niro,

niro, niro comm'a che!...

'O contano 'e ccummare chist'affare:

"Sti fatte nun só' rare,

se ne contano a migliara!

A 'e vvote basta sulo na guardata,

e 'a femmena è restata,

sott''a botta, 'mpressiunata..."

Séh! na guardata, séh...

Séh! na 'mpressione, séh...

Va' truvanno mo chi è stato

ch'ha cugliuto buono 'o tiro:

chillo, 'o fatto, è niro, niro,

niro, niro comm'a che!...

Ha ditto 'o parulano: "Embè parlammo,

pecché, si raggiunammo,

chistu fatto nce 'o spiegammo!

Addó' pastíne 'o ggrano, 'o ggrano cresce...

riesce o nun riesce,

sempe è grano chello ch'esce!"

Mé', dillo a mamma, mé'...

Mé', dillo pure a me...

Ca tu 'o chiamme Ciccio o 'Ntuono,

ca tu 'o chiamme Peppe o Giro,

chillo...'o ninno, è niro, niro,

niro, niro comm'a che!...

Vierno

versi di Armando De Gregorio, musica di Vincenzo Acampora (1945)

E' vierno: chiove, chiove 'a na semmana...

e st'acqua assaje cchiù triste mme mantene...

Che friddo, quanno è 'a sera, ca mme vène...

cu st'aria 'e neve, mo ca manche tu.

'Sta freva, ca manch'essa mm'abbandona,

'sta freva, 'a cuollo, nun se leva cchiù!

Vierno!

che friddo 'int'a stu core...

e sola tu,

ca lle puó' dá calore,

te staje luntana e nun te faje vedé'!

Te staje luntana e nun te cure 'e me!

Ca mamma appiccia 'o ffuoco tutt''e ssere

dint'a 'sta cammarella fredda e amara?!

"Ma che ll'appicce a fá, vecchia mia cara,

s'io nun mme scarfo manco 'mbracci'a te!?"

Povera vecchia mia...mme fa paura:

è n'ombra ca se move attuorno a me!...

Vierno!

che friddo 'int'a stu core...

e sola tu,

ca lle puó' dá calore,

te staje luntana e nun te faje vedé'!

Te staje luntana e nun te cure 'e me!

Accarezzame

versi di Nisa, musica di Pino Calvi (1954)

Stasera, core e core, 'mmiez'ô ggrano,

addó' ce vede sulamente 'a luna...

io cchiù t'astrégno e cchiù te faje vicino,

io cchiù te vaso e cchiù te faje vasá...

Te vaso...e 'o riturnello 'e na canzone,

tra ll'arbere 'e cerase vola e va...

Accarézzame!...

Sento 'a fronte ca mme brucia...

Ma pecché nun mme dá pace

stu desiderio 'e te?

Accarézzame!...

Cu sti mmane vellutate,

faje scurdá tutt''e peccate...

Strígneme 'mbracci'a te!...

Sott'a stu cielo trapuntato 'e stelle,

mme faje sentí sti ddete 'int''e capille...

Voglio sunná guardanno st'uocchie belle...

voglio sunná cu te!...

Accarézzame!...

Sento 'a fronte ca mme brucia...

Ma pecché nun mme dá pace

stu desiderio 'e te?

E nu rilorgio lentamente sona...

ma 'o tiempo s'è fermato 'nziem'â luna...

Io mme vurría addurmí 'mmiez'a stu ggrano

tutta na vita...pe' ll'eternitá...

E tu mm'accarezzasse chianu chiano...

e mme vasasse, senza mme scetá...

Accarézzame!...

Sento 'a fronte ca mme brucia...

Ma pecché nun mme dá pace

stu desiderio 'e te?

ARTICOLI CORRELATI
© 2024 Eddyburg